Íþróttamaður Húsavíkur 2011

Að loknu Húsavíkurmótinu í boccia hófst athöfn þar sem húsvískt íþróttafólk var heiðrað fyrir frammistöðu, ástundun og árangur á árinu 2011.

Nefnd á vegum Skjálfanda „um val á Íþróttamanni Húsavíkur“ annaðist afhendingu verðlauna. Forseti Kiwanisklúbbsins Skjálfanda, Egill Olgeirsson ávarpaði viðstadda, íþróttafólk, forsvarsmenn íþróttafélaganna og aðra gesti.  Hann sagði m.a. frá undirbúningi og hvernig staðið er að vali íþróttafólks og kjöri „Íþróttamaður Húsavíkur“ sagði hann m.a. að þetta væri í 16. skipti sem klúbburinn heiðrar afreksfólk í íþróttum og  veitti þeim viðurkenningar með þeirri aðferð sem hér væri viðhöfð.

Í allt voru veittar 18 viðurkenningar til íþróttafólks í tíu íþróttagreinum auk sérstakra verðlauna í formi ferðastyrks frá Kiwanisklúbbnum til eftirtalda einstaklinga sem urðu í þrem efstu sætum í vali á Íþróttamanni Húsavíkur 2011.

    Í  3.sæti varð  Sigurður Unnar Hauksson, skotíþróttamaður
    Í  2.sæti varð,  Bjarki Þór Jónasson, knattspyrnumaður
og  Íþróttamaður Húsavíkur 2011 varð Hafþór Mar Aðalgeirsson, knattspyrnumaður í Völsungi.

 

 

 

          

 

Íþróttamaður Húsavíkur 2011

Hafþór Mar Aðalgeirsson hefur náð þeim árangri að vera valinn besti knattspyrnur maður ársins 2011 á Húsavík.

 

„Hafþór hefur átt mjög gott ár 2011. Hann spilaði 21 leik með meistaraflokk Völsungs á tímabilinu og skoraði í þeim 9 mörk einnig tók hann þátt í landsliðsverkefnum U17 og U19 landsliða Íslands samtals 6 leiki. Haffi náði einnig að skora með landsliðinu í 1- 5 sigri Íslands á Wales. Haffi spilar að jafnaði  stöðu hægri kantmanns og er andstæðingum sínum erfiður vegna hraða og snerpu. Hafþór hefur farið mikið fram sem leikmanni sem sést á því að hann er einungis 17 ára gamall og hefur nú þegar spilað 31 leik með meistarafl. Völsungs og 11 landsleiki. Það eru ófáar ferðirnar sem hann hefur flogið til Reykjavíkur á árinu 2011 til æfinga með landsliðum. Hafþór sinnir knattspyrnunni af miklum áhuga og ákafi hans innan vallar er stundum á mörkum þess að vera of mikill en það er greinilegt að þarna er á ferðinni mikið efni.

 

Utan vallar sinnir Hafþór námi við FSH ásamt öðrum áhugamálum sem oft hlýtur að krefjast mikillar skipulagningar og góðs stuðnings fjölskyldu.
Hafþór er vel að tilnefningu knattspyrnumanns ársins 17 ára og eldri 2011”
  

Árangur Hafþórs Mar á knattspyrnuvellinum í íþrótt sinni er frábær og slíkur metnaður og sigrar ætti að vera mikil hvatning fyrir annað ungt íþróttafólk á Húsavík. 

 

Hafþór Mar hefur þrátt fyrir ungan aldur áður verið valinn knattspyrnumaður ársins á Húsavík, stendur nú efstur í vali á Íþróttamanni Húsavíkur fyrir árið 2011 og sýnir og sannar að hann er frábær íþróttamaður og vel að þessum titli kominn.
 
Hafþór Mar Aðalgeirsson  valinn „Íþróttamaður Húsavíkur 2011” fyrir frábæran árangur á knattspyrnuvellinum bæði með meistaraflokki Völsungs og með U17 og U19 ára  landsliðum Íslands.
Hafþór Mar  „Íþróttamaður Húsavíkur 2011” hefur sýnt og sannað að hann  á þennan heiður fyllilega skilið og er æsku- og íþróttafólki þessa lands til fyrirmyndar, og verðugur fulltúi Húsvískrar æsku og  íþróttamanna sem hefur borið hróður íþróttar sinnar víða bæði hér innanlands með Völsungi og erlendis með  U17 og U19 ára  landsliðum Íslands.

2. sæti í vali á íþróttamaður Húsavíkur 2011.

Besti knattspyrnumaður ársins 2011 á Húsavík  16 ára og yngri

Bjarki Þór Jónasson

Bjarki sem aðeins var 16 ára á liðnu ári, hefur æft og spilað með öllum yngri flokkum Völsungs. Hann æfði mjög vel í byrjun árs þó hann ætti við meiðsli að stríða sem honum tókst svo að vinna bug á þegar leið á vorið.

Hann var valinn í úrtökuhóp  U-16 ára karlaliðs Íslands og endaði með því að vera valinn  í lið Íslands 2 sem tók þátt í Norðulandamótinu sl. sumar, en það var að þessu sinni haldið hér á landi og fóru leikirnir fram hér norðanlands. 

Bjarki spilaði meðal annars í hjarta varnarinnar í liði Íslands 2 hér á Húsavíkurvelli og náði einnig að skora eitt mark fyrir lið sitt sem hafnaði í fjórða sæti á mótinu aðeins hársbreidd frá því að leika til úrslita við lið Íslands 1, en lið Íslands 1 stóð svo uppi sem sigurvegari mótsins eftir sigur á Dönum. 

Bjarki lék með 3.fl. Völsungs og fór oft mikinn á vellinum jafnt sem miðvörður eða miðvallarleikmaður og var það mál manna í „brekkunni“ að þarna væri mikill „refur“ á ferð og má umbúðalaust  kvitta undir það. 

Um miðbik sumars fór Bjarki að banka nokkuð þungt á dyr meistaraflokks Völsungs.  Þessi högg þyngdust er leið á seinni umferð ísl.mótsins og endaði svo með því að dyrnar gáfu sig. 

 

Þarna var ekki aftur snúið hjá Bjarka og tók hann þátt í síðustu leikjum mfl. Völsungs sumarið 2011 og stóð sig með miklum „bravör“.  

Bjarki er því vel að þessari viðurkenningu kominn.

 

 

3. sæti í vali á íþróttamaður Húsavíkur 2011.                                                         
   
Besti skotmaður ársins 2011  á Húsavík  17 ára og eldri

Sigurður Unnar Hauksson

Skotfélag Húsavíkur tilnefnir Sigurð Unnar Hauksson sem skotíþróttamann Húsavíkur. Sigurður náði frábærum árangri á árinu og ber þar helst að nefna þegar hann varði Íslandsmeistaratitil sinn  í unglingaflokki með glæsilegum árangri þegar hann skaut 100 af 125 dúfum. Verður það að teljast eftirtektarvert skor þar sem Sigurður hefur aðeins stundað skotfimi í 2 ár.

Lagði hann þá meðal annars fyrrum fjórfaldan Íslandsmeistara.
 
Þá varð Sigurður einnig bikarmeistari unglinga á árinu. 

Á innanfélagsmótum stóð Sigurður sig einnig mjög vel og endaði á verðlaunapalli á öllum mótum sem hann tók þátt í.  Þessum árangri má meðal annars þakka að Sigurður hefur verið undir handleiðslu eins af landsliðsmönnum Íslands sem kom sérstaklega til Húsavíkur til að þjálfa hann.         
Þá hefur Sigurður einnig farið þó nokkrar ferðir suður til æfinga, kom það til út af eftirtektarverðum árangri hans árið 2010.  Það má með sanni segja að þessar æfingar hafi skilað sér eins og sjá má á hans árangri nú á árinu.

Sigurður hefur mikinn metnað og hefur lagt mikið á sig til að ná þessum árangri og er hann góð fyrirmynd fyrir þá sem vilja stunda og ná árangri í skotíþróttum.
 
Sigurður  er efnilegur skotmaður þó ungur sé aðeins 17 ára og á eftir að ná langt í íþróttinni haldi hann áfram á þessari braut.

 

EgO